முரண்களின் வாழ்வு !

முரண்களின் வாழ்வு !
**********************************

* தன் பெயரை விரும்பாத
வழக்கறிஞர் 
அரிச்சந்திரன்

* இவர் பெயருக்குத்தான்
மருத்துவர் ...
வைத்தியநாதன்

* கசாப்பு கடை
உரிமையாளர்...
காந்தி !

* முதியோர் பென்ஷன்
கைநாட்டு போட்டாள்
சரஸ்வதி !

* குளம் காணவில்லை
ஊரின் பெயர் மட்டும் ....
தாமரைக்குளம் !

.............கா.ந.கல்யாணசுந்தரம்

நம்பிக்கை வாசல்

@ கடல்வெளி மணல்மேட்டில்

புதைந்துகிடக்கிறது

காதலின் ரகசியங்கள்

@ வளையல் துண்டுகள்

புழுவானது எப்போது ?

கொத்தும் கோழிகள்

@ நினைக்கும் மனமின்றி

காதலியின் போக்கு...

மறதியை மறந்ததால்

@ அன்பொடு அகத்தூய்மை

அழைத்துச் செல்லும்

அறிவுச் சுரங்கத்தினுள்

@ பலவீனமான சிந்தனை

தகர்த்துவிடுகிறது

வெற்றியின் படிகளை

@ ஒப்பிடும் தன்மையால்

உருக்குலைந்து போகிறது

நம்பிக்கை வாசல் .....கா.ந.கல்யாணசுந்தரம்.

ஞான மரபில் ....

ஆயிரக் கணக்கில் 

அவல காட்சிகள் ...

மூடிய இமைக்குள் !

இதயம் கனத்து 

இடம்பெயர்ந்தது ...

பிரிவின் வலி ...!

தோளில் அமர 

துடித்தன சுமைகள்... 

இலகுவாய் !

நெற்றியில் உதிரும் 

வியர்வைத் துளியில்... 

உழைப்பின் வாடை !

வெற்றியின் படிகளை 

அடையாளம் கண்டன ...

தோல்வியின் கால்கள் !

மனித மனத்தின்

பெரும் பயணம்

ஞானமரபுகளைத் தேடி

நுண் அணுக்களின்

கூட்டுப் பொருட்கள்

பிரபஞ்சம்

ஆன்மீகத் தேடலில்

மூன்று வழித்தடங்கள்

பக்தி ஞானம் தியானம்

செயல்களின் வடிவம்

பிறப்பெடுக்கிறது...

நாம் யார் எனும் சிந்தனைகளில் !

குற்றமற்ற கலாச்சாரத்தில்

பதுங்கியுள்ளது

அறிவியல் வாழ்க்கை !

நவீன தகவல் தொடர்புகள்

அடையாளம் காட்டுகின்றன...

கலாச்சார சீரழிவுப் பாதைகளை !

இலக்கண இலக்கியங்களின்

பாரம்பரியத்தில் தோன்றியது...

தமிழ்மொழிக் குடும்பம் !

இன்றைய சோர்வை விலக்கும் 

திறனிருந்தால்...

நாளைய மலர்தல் நமக்காகவே !

அடக்கமெனும் அணிகலன்

அணிந்தவர்கள்...

அறத்தின் காவலர்கள் !

நற்செயல் நடப்பதெல்லாம்

நல்லோர்கள் முடிவெடுக்கும்

இறைத்தன்மை !

பயணத் திசைகளின்

வெற்றி இலக்குகள் 

நம்மிடமே !

இழப்பதற்கு ஒன்றுமில்லை

கொண்டுவந்தது

ஏதுமில்லை என்பதால் !

மனவமைதிப் பூங்காவில்

இடையிடையே ...

உறவுப் பாலங்கள் !

சொற்பகாலங்களின் 

வாழ்வுரிமை ...

குழப்பவாதிகளின் குதூகலம் !

மன இறுக்கத்தில் 

மேடைபோட்டு அமர்ந்துவிடுகிறது ...

இறுமாப்பும் கர்வமும் !

தன்னிலை மறந்தோர்கள்

முன்னிலை வகித்தாலும்

தழைக்காது தர்மவாழ்வு !

.....கா.ந.கல்யாணசுந்தரம் 

சிலம்புச் செய்திகள் குறும்பா வடிவில்....

*மரபுவழி மங்கள நாணொடு

புகாரில் மனையறம் கொண்டாள்...

கற்புக்கரசி கண்ணகி !

*மாசறு பொன்னுடன்

நல்லறம் சிறக்க இல்லறமானது...

கோவலனின் வாழ்வு !

*தன்னிலை மறக்கும்

சொர்க்கபுரியானது...

நரவுப்பட்டின வசந்தவிழா!

*விடுதலை அறியா

விருப்பினனாகினான்...

கோமகன் கோவலன்!

*யாழிசை மீட்டியபடி கடலாடிய

கானல்வரிப் பாடல்கள்...

கோவலனோடு மாதவி !

*ஆடல்மகள் மாதவியின் கூடலில்

குன்றமன்ன பொருளிழந்தான்...

குற்றமற்ற கண்ணகியின் கணவன்!

*ஊழ்வினை உறுத்த

மாதவியின் கரம் நெகிழ...

கோவலனின் அடுத்த பயணிப்பு !

*பயனின்றி போனது

மாதவிக்கு ...

தோழி வசந்தமாலையின் தூது !

*விடியும்முன் நெடும்பயணம்

கவுந்தி அடிகளோடு

மதுரை மாநகர்க்கு

*கௌசிகன் மாடலன் மாதரி

இவர்களுடன் வாழ்வு...

சிலகாலமே கண்ணகிக்கு !

*சூழ்ச்சிமிகு பொற்கொல்லன்

ஆராயாத அந்தப்புர அரசன் ...

கொலைக்களம் கண்டான் கோவலன் !

*ஒற்றைக் காற்சிலம்பு

மாணிக்கப்பரல் தெறிக்கும் சாட்சியால்...

நீதி பிறக்க மதுரை எரிந்தது !

*போற்றா ஒழுக்கம் புரிந்தாலும்

மாறா உளத்திரத்தால்

பாட்டுடைத் தலைவியானாள் கண்ணகி !

*மலைவளம் கண்ட சேரன்

செங்குட்டுவன் அமைத்தான் ...

பத்தினிக்கோட்டம் கண்ணகிக்கு !

........கா.ந.கல்யாணசுந்தரம்

.

பூங்காவில் ஓய்வெடுத்தன....

ஒரு குளிர் இரவில் ...

மகரந்தங்களின் வசந்தகாலம்....

மகரந்தங்களின் 
வசந்தகாலம்....
பட்டாம்பூச்சியின் அமர்வு !

டிஜிட்டல் உலகம்
அறுவடை செய்கிறது....
விவசாயிகளின் தற்கொலைகள் !

இசையின் சிகரங்களில் 
ஏகாந்த நிலைதரும் .....
சலங்கை ஒலி !

விண் காணும் தளிர்கள் 
மண் நோக்கி ....
சருகுகள் !

தியாக ஒளி பரப்பி 
என்றென்றும் நல்வழி காட்டும்....
தாயன்பு !

..........கா.ந.கல்யாணசுந்தரம்