இல்லம் நிறைந்திருந்தது

இல்லம் நிறைந்திருந்தது
பொன்பொருளால் அல்ல...
மழலைச் சொற்களால்!

....கா.ந.கல்யாணசுந்தரம்.

இறைவா...உனக்கு வாகனமாய்
இருப்பதைவிட குடையாய் இருப்பேன்....
பாரம் சுமப்பவருக்கும் நிழல்தரவே!

.....கா .ந .கல்யாணசுந்தரம் .

நட்பின் இலக்கணம்!

 

 

 

பிரித்து எழுதி

பொருள் கூற முடியாது...

நட்பின் இலக்கணம்!

 

 

.....கா.ந.கல்யாணசுந்தரம்.

முதுமை உள்ளம்....

இருமலுடன் இரவைக் கழித்த
முதுமயின் இதயம் துடித்தது...
மகனே உறக்கம் கலைந்துபோனதா?

......கா.ந.கல்யாணசுந்தரம்.

நெஞ்சம் உணர்ந்தது...

அவளின் விரல் பட்டதும்
நெஞ்சம் உணர்ந்தது...
ஒரு புரிதலுக்கான பிரிவை!

......கா.ந.கல்யாணசுந்தரம்.

உள்ளம் மட்டும்....

ஊஞ்சலில் ஆட அமர்ந்தும்
அவனை நினைத்து அவளின்....
உள்ளம் மட்டும் ஊசலாடியது

...கா.ந.கல்யாணசுந்தரம்.

நாராய் நாராய் செங்கால் நாராய்.....

பனங்கிழங்கு அலகுகளால்
மீன்பிடித் தொழில்...
செங்கால் நாரைகள்!

....கா.ந.கல்யாணசுந்தரம் .

புன்னகை மறந்த மானுடம்

ஒரு தலைமுறைக்கான இடைவெளியில்
தொலைத்ததை மீண்டும் தேடுகிறது....
புன்னகை மறந்த மானுடம்!

........கா.ந.கல்யாணசுந்தரம்.

மழலையின் அறிவிப்பு

அச்சமும் நாணமும்

பெண்மையின் இலக்கணமென ...
அறிவுறுத்தும் மழலை!

அடுத்தவேளை

அடுத்தவேளை

உணவுக்கில்லை...
சமைந்தாள் மகள் !

பாலில் நெல்

பாலில் நெல்

கலந்தபோது....
பதறியது பாலாடை!

சரியான மருத்துவம் இல்லை...

வாதநோய்க்கு இன்னும்
சரியான மருத்துவம் இல்லை...
தீவிரவாதம்!

விதைக்குள் விருட்சம்

விருட்சங்களைக் காப்பாற்றுங்கள்
காரணம் விதைகள் வேண்டும்....
விருட்சங்களை எப்போதும் காண!

அந்தர வாழ்க்கை.....

கால் வயிற்றுக் கஞ்சிக்கு
கயிற்றில் அந்தர வாழ்க்கை...
தூக்கிலிடு சமுதாயத்தை !

......கா.ந.கல்யாணசுந்தரம்.

மௌனம்....

ஒரு பிரபஞ்சத்தின்
அந்தரங்க மொழி...
மௌனம்!

அகத் தூய்மையும்
ஆன்ம பலமும்...
பொய்மை பேசாதிருத்தல்!

பாய்மரக் கப்பலில்
பயணிக்கிறோம்...
இலக்கைநோக்கி!

நீயும் ஒருநாள் என்னைப்போல்
சொன்னது...
கழற்றிய சட்டை!

....கா.ந.கல்யாணசுந்தரம்.

சிந்தனை மலர்கள்!

பூமியைக் காட்டி
குழந்தைக்கு சோறு ஊட்டினாள்...
நிலவில் தாய்!

விளையாடும் வயதை மறந்து
வயிற்றுப் பிழைப்பில் ...
பொம்மை விற்கும் சிறுமி!

கோலத்தை அழித்த மேகம்
அறிவுறுத்தியது....
புதியதொன்றை போடச்சொன்னது!

கொள்கைப் பிடிப்பின்றி எங்களை
பறக்கவிட்டால் மட்டும் போதுமா?
வெள்ளைப் புறாக்கள்!

வாடாமல் மணம்பரப்பி
தடம் பதிக்கின்றன...
சிந்தனை மலர்கள்!

............கா . ந.கல்யாணசுந்தரம்.

புரிதல் ஹைக்கூ

தவமாய் தவமிருக்கும்
கூட்டுப்புழுவின் காத்திருப்பு....
ஒரு வண்ணமயமான வாழ்வுக்கு!

எங்களின் எதிர்காலம் அழிக்கப்பட்டதோ?
ரேகை அழிந்த நிலையில்....
உழைக்கும் கரங்கள்!

ஒரு தலைமுறைக்கான இடைவெளியில்
தொலைத்ததை மீண்டும் தேடுகிறது....
புன்னகை மறந்த மானுடம்!

பயணிக்கும் திசையில் மட்டுமில்லாமல்
வாழ்நாள் முழுவதும் வேண்டும் ...
ஒளிமயமான பசுமைக்காலம் !

பிரிந்தபோதுதான் தெரிந்தது
இன்பம் மட்டுமே அல்ல....
வாழ்க்கையின் புரிதல் !

.......கா.ந.கல்யாணசுந்தரம்.